रौतहट, माघ २८, २०७४ बज्जिका भाषामे किताव निकले जारहल हए । प्रदेश नं २ के बालबालिकासवके लेल बज्जिका आ भोजपुरी भाषामे किताव निकले जारहल हए । विश्व शिक्षाके सहयोगमे स्कुलसे बाहर रहल बालबालिकासवके सहलियतके लेल बज्जिका भाषामे किताव निकले जारहल हए । विश्वभरमे अभि भि बहुत अर्बो बालबालिका स्कुलके पहुचसे बाहर रहल हए । लईकासव स्कुल नजाएके बहुत कारण मध्ये एगो भाषाके समस्या भि रहल अध्ययन देखएले हए । भाषा भि नबुझलाके चलते बालबालिकासव स्कुल जाएसे बञ्चित रहल देखलगेल हए । नेपालमे खासकके नेपाली भाषामे हि पढाई होखले, हिमाल पहाडके सभि बच्चा लईकेसे हि नेपाली बुझलासे ओकनिके भाषाके समस्या नरहले लेकिन तराई मधेशके रौतहट सहितके जिल्लामे बेसी बज्जिका भाषा हि बोलल जाले जौनाके चलते ईहाके बालबालिका नेपाली कम बुझले आ बज्जिका बेसी बुझले, लेकिन ईहाके स्कुलसवमे हि नेपाली भाषामे हि पढाई होएलासे बच्चासव नेपाली भाषा नबुझलासे भि स्कुल जाएके नचाहले, ओहिसे प्रदेश नं २ के रौतहट, पर्सा, बारा सर्लाही लगाएतके जिल्लाके बालबालिकाके बुझेवला भाषा बज्ज्किामे किताव निकालेके विश्व शिक्षा तयारी कएले हए । विश्व शिक्षा ईहाके स्थानीय भाषा बज्जिकामे हि किताव निकालके बच्चासवके उपलब्ध करावेके योजना बनएले हए । स्थानीय भाषामे किताव निकालके स्कुलके पहुचसे बाहर रहल बालबालिकाके स्कुलमे लेआवेके विश्व शिक्षा कार्यक्रमके लक्ष्य हए । बज्जिका भाषामे निकलेवला किताव अनलाईनमे भि रखाएवला हए । ब्लूम स्फटवेर प्रयोग कके उ किताव निकले जारहल हए । ब्लूम स्फटवेर मार्फत निकलेवला किताव ईन्टरनेटके माध्यमसे विश्वके कौनो भि कोनासे पढल जासकले । विश्व शिक्षाके सहयोग आ आरडिसी नेपालके सहकार्यमे बज्जिका भाषामे किताव निकालेके लेल बज्जिका भाषाके जानकार लोगके २ दिन तालिम भि देलगेल हए । बज्जिका भाषाके कितावके लेल आरडिसी नेपालके कार्यालय गौरमे काल्हुएसे शुरुरहल तालिम आजु सम्पन्न भेल हए । तालिममे बज्जिका भाषाके उत्थान आ विकासके लेल निरन्तर कलम चलावेवला रौतहटके राम सागर साह, भृग यादव, पत्रकार दिनेश संगम, गोपाल दास आ हम ओम प्रकाश यादवके सहभागिता रहल रहे । तालिममे सहभागिसवके बज्जिका भाषाके किताव निकालेके जिमेवारी देलगेल हए । तालिममे बज्जिका भाषाके किताव कईसे स्फटवेर प्रयोग कके निकालेके हए से सिखावल गेल हए ।

LEAVE A REPLY

Please enter your comment!
Please enter your name here